Dtogra agus Ábhair

Dtogra
• Spleáchas an Aontais ar ghníomhaithe eachtracha a laghdú in earnálacha atá straitéiseach ó thaobh an gheilleagair de
• Spleáchas an Aontais ar ghníomhaithe eachtracha a laghdú i réimse an fhuinnimh
• Caighdeáin a shainiú laistigh den Aontas agus lasmuigh de maidir le trádáil agus caidrimh infheistíochta
• Caighdeáin a shainiú laistigh den Aontas agus lasmuigh de maidir le beartais chomhshaoil
• Cinnteoireacht agus comhtháthú laistigh den Aontas
• Trédhearcacht an Aontais agus a chaidreamh leis na saoránaigh
• An tAontas mar ghníomhaí láidir ar fud an domhain i réimsí na síochána agus na slándála
• An tAontas mar ghníomhaí láidir ar fud an domhain chun caidrimh a neartú

Gnóthaí eachtracha, slándáil agus cosaint: I réimse an bheartais eachtraigh agus slándála, chuir na tograí i bhfáth gur cheart don Aontas deireadh a chur le cinntí beartais eachtraigh agus slándála a dhéanamh le haontoilíocht, agus in ionad na haontoilíochta, athrú go cinnteoireacht trí thromlach cáilithe. Tá sé sin i gcomhréir le héilimh leantacha ó Pharlaimint na hEorpa, atá ag iarraidh go bhfreagróidh an Eoraip níos tapúla agus le níos mó diongbháilteachta.

Ní mór don Aontas a bheith in ann labhairt le haon ghuth amháin agus gníomhú mar fhíorghníomhaí domhanda, agus tá sé riachtanach ról Ardionadaí an Aontais a neartú. Agus é ag déileáil le tríú tíortha, ní mór don Aontas leas maith a bhaint as a ualach comhchoiteann polaitíochta agus eacnamaíochta chun stáit, eagraíochtaí agus daoine aonair a bhrú chun a bhunphrionsabail a chomhlíonadh.

I réimse na cosanta agus na slándála, éilítear sna tograí comhphlé a chur chun cinn agus síocháin a ráthú, le fórsa armtha an Aontais a bheadh le húsáid don fhéinchosaint agus chun teacht roimh ghníomhaíocht mhíleata. Ní fhéadfaí an fórsa a imscaradh lasmuigh den Aontas ach amháin i gcásanna eisceachtúla agus le sainordú ó NA.

Trádáil idirnáisiúnta: I réimse na trádála, moltar sna tograí slabhraí soláthair a éagsúlú mar bhealach chun uathriail na hEorpa in earnálacha ríthábhachtacha a neartú. Bealach amháin chun an cuspóir seo a bhaint amach, arna athlua i roinnt rún ó Pharlaimint na hEorpa, is ea caibidlíocht trádála uaillmhianach, a chuirtear i gcrích níos fearr mar bhloc an Aontais seachas mar thíortha aonair.

Faoi láthair, tá roinnt comhaontuithe trádála ann, a bhfuil stádais ullmhachta dhifriúla acu, le tíortha éagsúla amhail an tSile, Meicsiceo, an Nua Shéalainn, an Astráil agus tíortha Mercosur. Mar an páirtí atá i gceannas ar an bpróiseas caibidlíochta agus na comhaontuithe a thagann uathu a imscrúdú, is minic a éilíonn Parlaimint na hEorpa go dtabharfar faoin gcaibidlíocht sin ar bhealach atá chomh trédhearcach agus is féidir, agus rinneadh an t-éileamh sin arís agus arís eile i dtograí na meithle. Chuir an mheitheal i bhfáth gur cheart go ndéanfaí comhaontuithe trádála a dhaingniú níos tapúla.

Áitíonn Cruinniú Iomlánach na Comhdhála: nach mór do na rialacha do chuideachtaí atá in iomaíocht ar an margadh inmheánach a bheith cothrom agus cóir. Aontaíonn Parlaimint na hEorpa: go bhfuil togra reachtach maidir le hiomaíocht chóir a chruthú trí frithghníomh a dhéanamh in aghaidh fóirdheontais eachtracha ar an margadh inmheánach ag dul tríd an bpróiseas reachtóireachta faoi láthair, agus go bhfuil ceann eile a d'osclódh margaí soláthair phoiblí eachtracha do chuideachtaí san Aontas ag teannadh le deireadh an phróisis.

Leis na tograí, cruthaítear nasc láidir idir beartas eachtrach, trádáil agus luachanna Eorpacha agus príomhchuspóirí Eorpacha, trí ghné eiticiúil agus chomhshaoil chaidrimh thrádála agus infheistíochta an Aontais a neartú. Tá sé mar aidhm acu trádáil idirnáisiúnta a nascadh le bearta beartais aeráide chun a áirithiú go gcuirfear caighdeáin mhaithe oibre chun feidhme ar fud na slabhraí luacha domhanda, go seasfar le caighdeáin um chearta an duine agus cearta na gceardchumann agus go ndéanfar earraí a allmhairiú san Aontas agus na spriocanna forbartha inbhuanaithe á n-urramú. Cosúil le Parlaimint na hEorpa, moltar i gCruinniú Iomlánach na Comhdhála caibidlí trádála agus forbartha inbhuanaithe a fhorfheidhmiú i gcomhaontuithe saorthrádála an Aontais. Tá an tAontas i mbun an phróisis reachtaigh faoi láthair lena nuashonraítear leabhar rialacha a chláir trádála tosaíochta i gcomhair tíortha i mbéal forbartha: cosúil lena bhfuil Coiste Trádála Pharlaimint na hEorpa ar tí a mholadh, éilíonn an mheitheal freisin forálacha coinníollachta níos láidre agus próisis faireacháin agus comhphlé éifeachtacha leis na tíortha a bhaineann tairbhe as an socrú aontaobhach sin.

Moltar sa Chruinniú Iomlánach nach mór tús áite a thabhairt don iltaobhachas i gcomhar le príomhrúin beartais eachtraigh agus trádála Pharlaimint na hEorpa sa bheartas eachtrach agus cosanta agus sa trádáil.